چھتیس گھنٹوں میں 8 لڑکیوں سمیت 12 کم سن بچے لاپتہ، اسمگلنگ کا خدشہ، ممبئی میں الرٹ! ۔

چھتیس گھنٹوں میں 8 لڑکیوں سمیت 12 کم سن بچے لاپتہ، اسمگلنگ کا خدشہ، ممبئی میں الرٹ! 

جون سے دسمبر تک تقریباً دیڑھ سو بچے لاپتہ، بچوں کی تلاش کیلئے ممبئی پولس کی خصوصی ٹیمیں تشکیل 

ممبئی : 2 فروری (بیباک نیوز اپڈیٹ) ایسی خبر سامنے آئی ہے جس نے ممبئی والوں کی پریشانی بڑھا دی ہے۔ چونکا دینے والی معلومات کے مطابق ممبئی سے گزشتہ 36 گھنٹوں میں 12 نابالغ لاپتہ ہو گئے ہیں۔ لاپتہ ہونے والوں میں 8 لڑکیاں بھی شامل ہیں۔ممبئی کے 7 مختلف پولس اسٹیشن کی حدود میں بچے لاپتہ ہو گئے ہیں۔ اس وجہ سے ممبئی پولس نے 'ہائی الرٹ' جاری کر دیا ہے۔ چونکہ ایک ہی وقت میں اتنے بچے لاپتہ ہو چکے ہیں، اس لیے خدشہ ہے کہ انسانی اسمگلنگ کرنے والے گروہ سرگرم ہیں۔ پولس لاپتہ بچوں کی تلاش کر رہی ہے۔

بھارت کی معاشی دارالحکومت ممبئی سے نابالغ بچوں کا لاپتہ ہونا سنگین اور تشویشناک ہے۔ والدین کی طرف سے دی گئی شکایت کی بنیاد پر، پولس نے تعزیرات ہند (آئی پی سی) کی دفعہ 137(2) کے تحت 12 نامعلوم افراد کے خلاف مقدمہ درج کیا ہے۔ اس قسم کی گمشدگی نے ممبئی میں سرگرم بچوں کی اسمگلنگ گینگ کے بارے میں تشویش میں مزید اضافہ کر دیا ہے۔ پولس نے بچوں کی تلاش کے لیے مختلف ٹیمیں تشکیل دے دی ہیں۔

پولس نے شیواجی نگر (4)، ساکی ناکا (2)، اینٹاپ ہل (2) اور اوشیوارہ، مانخورد، بنگور نگر اور گھاٹ کوپر سے ایک ایک بچے کے لاپتہ ہونے کا مقدمہ درج کیا ہے۔ پولس نے کہا کہ ابھی تک کسی خاندان کو ہفتہ وصولی کی کال موصول نہیں ہوئی ہے۔ ممبئی میں بچوں کی تلاش کے لیے خصوصی مہم چلائی جا رہی ہے۔ پرہجوم بازاروں، عوامی گارڈن ، ریلوے اسٹیشنوں، بس ڈپو، ہسپتالوں، یتیم خانوں اور دیگر عوامی مقامات پر گمشدہ بچوں کی تصاویر چسپاں کردی گئی ہیں۔

ممبئی میں گزشتہ چند دنوں میں لاپتہ ہونے والے نابالغ بچوں کی تعداد میں اضافہ ہوا ہے۔ جون سے دسمبر کے درمیان 145 بچے لاپتہ ہوئے۔ ان میں سے 93 لڑکیاں تھیں۔ یکم نومبر سے 6 دسمبر کے درمیان کل 82 افراد کے لاپتہ ہونے کی اطلاع ملی۔ ان میں نصف سے زیادہ لڑکیاں تھیں۔ 41 لڑکیاں اور 13 لڑکے 18 سال سے کم عمر کے تھے۔

2025 میں کس مہینے میں کتنے لاپتہ ہیں؟

جون: 26 لڑکیاں

جولائی: 25 (15 لڑکے، 10 لڑکیاں)

اگست: 19  (پانچ لڑکے، 14 لڑکیاں)

ستمبر: 21 (چھ لڑکے، 15 لڑکیاں)

اکتوبر: 19 (12 لڑکے، سات لڑکیاں)

نومبر: 24 (نو لڑکے، 15 لڑکیاں)

دسمبر: 11 (پانچ لڑکے، چھ لڑکیاں)

جون سے دسمبر تک 145 بچے لاپتہ ہوگئے ہیں۔ مزید بچوں کی گمشدگی سے پولس انتظامیہ الرٹ ہوچکی ہے اور جگہ جگہ تلاشی لی جارہی ہے ۔