ناسک ضلع پھر ژالہ باری اور غیر موسمی بارش کی زد میں! مالیگاؤں تعلقہ میں دیوار گرنے سے لڑکا ہلاک

ناسک ضلع پھر ژالہ باری اور غیر موسمی بارش کی زد میں! مالیگاؤں تعلقہ میں دیوار گرنے سے لڑکا ہلاک

مالیگاؤں:30 مارچ (بیباک نیوز اپڈیٹ) ناسک ضلع کے کچھ حصوں بشمول مالیگاؤں، باگلان، دیولہ اور سنر تعلقہ میں پیر کی شام کو تیز آندھی، ژالہ باری اور بجلی گرنے کے ساتھ غیر موسمی بارش ہوئی۔ مالیگاؤں میں دیوار گرنے سے ایک لڑکا ہلاک ہوگیا۔ باگلان میں شدید ژالہ باری کی اطلاعات ہیں۔ اس بے موسمی بارش سے فصلوں کو بڑا نقصان پہنچنے کا خدشہ ہے۔ضلع گزشتہ چند دنوں سے بے موسم بارش کی زد میں ہے۔ مالیگاؤں اور باگلان میں دس دنوں میں تیسری بار غیر موسمی بارش ہوئی۔ پیر کی شام غیر موسمی بارش کے ساتھ آندھی، ژالہ باری اور آسمانی بجلی نے ان دونوں تعلقہ کو متاثر کیا۔ سنر سمیت آس پاس کے کچھ علاقوں میں بھی ژالہ باری اور موسلا دھار بارش ہوئی۔ باگلان تعلقہ میں پمپلی کوٹھے، دریگاؤں، طاہرہ آباد، ملہیر، داس ویل، بھیلواڑ، اجمنے، سٹانا، منجواڑ، تلواڑے، سورانے، مور نگر وغیرہ میں موسلادھار بارش ہوئی، ان علاقوں میں زبردست ژالہ باری بھی ہوئی۔ بھاری بارش کے دوران مالیگاؤں تعلقہ کے ونپت میں ایک دیوار گر گئی۔ ریذیڈنٹ ڈپٹی کلکٹر روہت راجپوت نے بتایا کہ اس حادثہ میں یش پروین شندے (14) کی موت ہوگئی۔ سنر اور گردونواح میں ژالہ باری اور بے موسمی بارش بھی ہوئی۔

پیر کی دوپہر تک شدید گرمی محسوس کی گئی۔ تاہم دوپہر کے بعد اچانک آسمان پر بادل جمع ہوگئے۔ شام چار بجے کے بعد کئی مقامات پر طوفانی ہواؤں کے ساتھ تیز بارش شروع ہوگئی۔ بعض مقامات پر ژالہ باری بھی ہوئی۔ باگلان تعلقہ کے کئی دیہات میں بارش بہت زیادہ رہی۔ خاص طور پر مانسون پٹی میں ملہیر اور نامپور کے علاقوں میں تقریباً دو گھنٹے تک بارش ہوئی۔ بارش اور طوفان کے باعث دیہی علاقوں میں کئی مقامات پر بجلی کی فراہمی متاثر ہوئی۔ اس بارش سے کھیتوں میں کھڑی فصلوں کو نقصان پہنچا۔ کاشتکار پریشان ہیں کیونکہ اس بارش سے پیاز، گندم، چنے، سبزی اور انار کی فصلیں متاثر ہوں گی۔ طوفانی ہواؤں کے ساتھ ہونے والی بارش سے بعض علاقوں میں بجلی کی فراہمی میں خلل پڑا۔ چونکہ یہ بارش اس وقت ہوئی جب گندم اور پیاز کی کٹائی ہو رہی تھی، اس لیے فصلوں کو بڑے نقصان کا اندیشہ ہے۔