تشہیری مہم ختم ہونے کے بعد تمام میڈیا پر انتخابی اشتہارات کی اشاعت پر پابندی، ریاستی الیکشن کمیشن کی میٹنگ

تشہیری مہم ختم ہونے کے بعد تمام میڈیا پر انتخابی اشتہارات کی اشاعت پر پابندی  

ریاستی الیکشن کمیشن کی سیاسی جماعتوں کے ساتھ میٹنگ 

مالیگاؤں : 26 دسمبر (بیباک نیوز اپڈیٹ) میونسپل کارپوریشنوں کے عام انتخابات کے لیے تشہیری مہم کا دورانیہ 13 جنوری 2026 کو شام 5.30 بجے ختم ہو جائے گا، اس کے بعد الیکٹرانک اور پرنٹ میڈیا سمیت کسی دوسرے میڈیا کے ذریعے کوئی انتخابی اشتہار شائع یا نشر نہیں کیا جائے گا، اس طرح کی تفصیل ریاستی الیکشن کمشنر دنیش واگھمارے نے دی۔میونسپل کارپوریشن انتخابات کے سلسلے میں ریاستی الیکشن کمیشن کے ذریعہ رجسٹرڈ اور تسلیم شدہ سیاسی جماعتوں کے نمائندوں کی میٹنگ کا انعقاد کیا گیا۔ موصوف اس وقت بول رہے تھے۔ اس موقع پر کمیشن کے سکریٹری سریش کاکانی، مختلف سیاسی جماعتوں کے نمائندے اور عہدیدار موجود تھے۔

واگھمارے نے کہا کہ میونسپل کارپوریشن کے انتخابات کے لیے ووٹنگ 15 جنوری 2026 کو صبح 7.30 بجے سے شام 5.30 بجے تک ہوگی۔ متعلقہ ایکٹ کی دفعات کے مطابق، عوامی مہم کا دورانیہ ووٹنگ کے اختتام سے 48 گھنٹے پہلے یعنی 13 جنوری 2026 کو شام 5.30 بجے ختم ہو جائے گا۔ اس کے بعد میڈیا میں کوئی اشتہار شائع یا نشر نہیں کیا جا سکے گا۔ اس لیے عوامی مہم کے خاتمے کے بعد پرنٹ میڈیا کے اشتہارات کے لیے پیشگی تصدیق یا اجازت کا سوال ہی پیدا نہیں ہوتا۔ اس سلسلے میں تفصیلات ریاستی الیکشن کمیشن کے 'میڈیا کنٹرول اینڈ ایڈورٹائزمنٹ سرٹیفیکیشن آرڈر فار دی پرپز آف الیکشنز، 2025' مورخہ 9 اکتوبر 2025 میں درج ہیں۔

کاکانی نے اس موقع پر تفصیلی پریزنٹیشن دی۔ انہوں نے کہا کہ دلچسپی رکھنے والے امیدوار کا نام متعلقہ میونسپل کارپوریشن کی انتخابی فہرست میں ہونا ضروری ہے۔ لیکن نامزد کنندہ اور تائید کنندہ کا نام ایک ہی وارڈ میں ہونا چاہیے جہاں سے امیدوار الیکشن لڑ رہا ہے۔ پارٹی امیدوار اور آزاد امیدوار کو بھی ایک ایک نامزد اور ایک حمایتی کی ضرورت ہوتی ہے۔ ایک امیدوار ایک سے زیادہ وارڈ میں کاغذات نامزدگی داخل کر سکتا ہے۔ لیکن ایک امیدوار ایک وارڈ میں صرف ایک سیٹ کے لیے الیکشن لڑ سکتا ہے اور ایک سیٹ کے لیے زیادہ سے زیادہ چار کاغذات نامزدگی داخل کیے جا سکتے ہیں۔