ٹیچر نے کلاس روم میں پھانسی لگا کر زندگی تمام کردی ، پاچورہ میں سنسنی خیز واقعہ، طلبہ میں خوف و ہراس

ٹیچر نے کلاس روم میں پھانسی لگا کر زندگی تمام کردی ، پاچورہ میں سنسنی خیز واقعہ، طلبہ میں خوف و ہراس

جلگاؤں : 25 جون (بیباک نیوز اپڈیٹ) جلگاؤں ضلع کے پاچورہ میں اسکول کے وقت ایک ٹیچر کے کلاس روم میں پھانسی لگا کر خودکشی کرنے کا ایک چونکا دینے والا واقعہ پیش آیا ہے۔ اس ٹیچر نے یہ انتہائی قدم کیوں اٹھایا؟ یہ ابھی تک واضح نہیں ہے۔ لیکن کلاس روم میں ٹیچر کی لاش دیکھ کر طلبہ میں خوف کی فضا پھیل گئی۔تفصیلات کے مطابق، یہ واقعہ پاچورہ کے سوپاڈو بھدو ودیا مندر اسکول میں پیش آیا۔ خودکشی کرنے والے ٹیچر کا نام رویندر بھرت مہالے بتایا گیا ہے۔ اس نے بدھ کی صبح 10.30 بجے اسکول کی دوسری منزل پر ایک کلاس روم میں پھانسی لگا کر خودکشی کرلی۔ اس وقت طلباء وسط مدتی وقفے (ریسیس) کے لیے کلاس روم سے باہر جا چکے تھے۔ کلاس روم میں کوئی نہیں تھا۔ رویندر مہالے نے اس موقع پر خودکشی کرلی۔ جب طلباء وقفے کے بعد کلاس روم میں واپس آئے تو انہوں نے ٹیچر کو لٹکا ہوا پایا۔ یہ دیکھ کر وہ شور مچانے لگے۔ جس کے بعد یہ معلومات سامنے آئی۔

ٹیچر رویندر مہالے نے خودکشی کیوں کی؟ یہ ابھی تک واضح نہیں ہے۔ لیکن واقعہ کی اطلاع ملتے ہی پاچورہ پولیس موقع پر پہنچ گئی اور لاش کو تحویل میں لے لیا۔ پولیس تمام زاویوں سے واقعہ کی تحقیقات کر رہی ہے۔ لیکن فی الحال یہ قیاس کیا جا رہا ہے کہ رویندر مہالے نے ذہنی تناؤ کی وجہ سے خودکشی کی ہو گی۔ اس معاملے میں پاچورہ پولیس اسٹیشن میں حادثاتی موت کا معاملہ درج کیا گیا ہے۔

رویندر مہالے پاچورہ تعلقہ کے دہیگاؤں سنت کے رہنے والے تھے۔ وہ پاچورہ کے سوپدو بھدو اسکول میں تدریسی خدمات انجام دیا کرتے تھے۔ پچھلے کچھ سالوں سے وہ پاچورہ شہر کے گیرہ پمپنگ روڈ پر رہائش پذیر تھے ۔ مہلے اپنی فصیح طبیعت اور اچھی شخصیت کے لیے مشہور تھے۔ اس لیے ان کی موت سے اسکول کے اساتذہ اور طلبہ میں غم اور تشویش کی فضا پھیل گئی ہے۔