مودی حکومت کا فیصلہ ،یکم جنوری سے غریب خاندانوں کو مفت اناج فراہم کیا جائے گا

مودی حکومت کا فیصلہ ،یکم جنوری سے غریب خاندانوں کو  مفت اناج فراہم کیا جائے گا 

نئی دہلی : 24 دسمبر (بیباک نیوز اپڈیٹ) نیشنل فوڈ سیکیورٹی اسکیم کے تحت مرکزی حکومت اگلے ایک سال یعنی یکم جنوری 2023 سے تمام 81.35 کروڑ مستفیدین کو مفت اناج فراہم کرے گی۔ یہ فیصلہ وزیر اعظم نریندر مودی کی صدارت میں کابینہ کی میٹنگ میں لیا گیا۔ مرکزی حکومت این ایف ایس اے کے تحت راشننگ کے علاوہ دیگر فلاحی اسکیموں کو سبسڈی دینے کے لیے 2 لاکھ کروڑ روپے سے زیادہ خرچ کرنے جا رہی ہے۔ مرکزی وزیر تجارت اور صنعت پیوش گوئل نے کہا ہے کہ اس فیصلے سے غریبوں کا مالی دباؤ کم ہوگا اور انہیں راحت ملے گی۔ کابینہ اجلاس کے بعد انہوں نے میڈیا سے بات چیت کی۔

 گوئل نے کہا کہ یہ ایک تاریخی فیصلہ ہے اور یہ ایک ایسا فیصلہ ہے جو فلاحی اسکیموں کے غریب استفادہ کنندگان کے تئیں وزیر اعظم نریندر مودی کی حساسیت کو ظاہر کرتا ہے۔  اس اسکیم کے تحت ترجیحی گھرانوں میں مستحقین کو فی کس 5 کلو گرام اناج مفت فراہم کیا جائے گا۔ نیز، انتیودئے فوڈ یوجنا کے تحت، فی خاندان 35 کلو گرام اناج، ایک سال کے لیے مفت فراہم کیا جائے گا۔ نیشنل فوڈ سیکیورٹی اسکیم کے تحت سبسڈی والے اناج 3 روپے فی کلو چاول، 2 روپے فی کلو گندم اور 1 روپے فی کلو موٹا اناج مستحقین میں تقسیم کیا گیا ہے۔ گوئل نے کہا کہ کابینہ نے فیصلہ کیا ہے کہ مستحقین کو مفت اناج ملتا رہے گا۔ انہوں نے بتایا کہ کووڈ کی مدت کے دوران، وزیر اعظم نریندر مودی کی قیادت میں، پردھان منتری غریب کلیان انا یوجنا کے تحت 28 ماہ تک مفت اناج تقسیم کیا گیا ہے ۔