چھوٹے پلاٹ ہولڈرز کی پریشانیاں ختم ، لینڈ ڈویژن ایکٹ میں ترمیم ، خرید و فروخت آسان، ریاستی حکومت کا فیصلہ

چھوٹے پلاٹ ہولڈرز کی پریشانیاں ختم ، لینڈ ڈویژن ایکٹ میں ترمیم ، خرید و فروخت آسان، ریاستی حکومت کا فیصلہ 

کیا ہیں ترامیم؟ دیکھئے کابینہ کے فیصلے کی مکمل تفصیلات 

ممبئی: 8 اکتوبر (بیباک نیوز اپڈیٹ) ریاستی کابینہ نے زیر التواء زمین کے لین دین کو آسان بنانے کے لیے لینڈ ڈویژن ایکٹ میں ترامیم کو منظوری دے دی ہے۔ اس کے نتیجے میں اب ڈویژن کے تحت زمین مفت میں ریگولرائز ہو جائے گی اور ہزاروں چھوٹے پلاٹ ہولڈرز کو ان کی زمین کی ملکیت مل جائے گی۔لینڈ ڈویژن ایکٹ ریاست میں زرعی زمین کو چھوٹے ٹکڑوں میں تقسیم ہونے سے روکنے اور منافع بخش کاشتکاری کی حوصلہ افزائی کے مقصد سے نافذ کیا گیا تھا۔ اس ایکٹ کے مطابق قابل کاشت اراضی کے لیے 20 گنٹے سے کم اور باغبانی کے لیے 10 گنٹے سے کم زمین کی خرید و فروخت ممنوع تھی۔ تاہم، اس سے چھوٹے پلاٹ ہولڈرز کے لیے ملکیتی حقوق حاصل کرنا، تعمیراتی اجازت نامے حاصل کرنا اور رجسٹریشن کرنا مشکل ہو گیا۔ اس پس منظر میں ریاستی حکومت نے اب اس ایکٹ میں نرمی کی ہے۔ اس کے مطابق، میونسپل کارپوریشن، میونسپلٹی، نگر پنچایت کے علاقوں اور گاؤں سے ملحقہ 200 سے 500 میٹر کے درمیان کا علاقہ اس فیصلے کے دائرے میں آئے گا۔ بلدیات کی حدود کے ساتھ دو کلومیٹر تک کا علاقہ بھی زیر غور آئے گا۔

اس فیصلے کے ساتھ یکم جنوری 2025 تک ایک گنٹھہ تک کے پلاٹوں کو قانونی حیثیت دی جائے گی۔ اس سے قبل ایسی زمینوں کو ریگولرائز کرنے کے لیے مارکیٹ ویلیو کا 25 فیصد فیس وصول کی جاتی تھی۔ بعد ازاں دسمبر 2023 کے سیشن میں اس فیس کو 5 فیصد تک کم کر دیا گیا۔ تاہم، چونکہ اس اسکیم کو خاطر خواہ رسپانس نہیں ملا، اس لیے ریگولرائزیشن مفت کی جا سکتی ہے۔ اس سے 50 لاکھ سے زائد خاندانوں کو فائدہ ہوگا۔جلد ہی اس تعلق سے سرکاری فرمان جاری ہوگا اور زمین کی خدید و فروخت شروع کردی جائے گی ۔

ترامیم و فیصلے کی تفصیلات  کیا ہیں؟

چھوٹے پلاٹ ہولڈرز مفت میں زمین کی رجسٹریشن کروا سکتے ہیں۔

ملکیت کے حقوق ملنے کے بعد جائیداد کی مارکیٹ ویلیو بڑھ جائے گی۔

چھوٹے پلاٹ پر تعمیرات کی اجازت حاصل کرنا ممکن ہو گا۔

چونکہ جائیداد رجسٹرڈ ہے، بینک اسے ضمانت کے طور پر قبول کریں گے۔

متعلقہ پلاٹ پر بینک لون حاصل کرنا آسان ہو جائے گا۔

زمیندار کے خاندان کے حصص قانونی طور پر رجسٹر کیے جا سکتے ہیں۔

شہری علاقوں میں چھوٹے پلاٹ بیچنا اور خریدنا آسان ہو جائے گا۔

اب رہائشی علاقوں میں 1 گنٹہ تک اراضی کا رجسٹریشن کیا جا سکتا ہے۔