ایم ایل اے مفتی اسمٰعیل پر بامبے ہائی کورٹ ناراض ، الیکشن پیٹیشن پر آئندہ سماعت 19 اگست کو

ایم ایل اے مفتی اسمٰعیل پر بامبے ہائی کورٹ ناراض ، الیکشن پیٹیشن پر آئندہ سماعت 19 اگست کو 

مالیگاؤں : 14 اگست (بیباک نیوز اپڈیٹ)اسمبلی چناؤ میں مذہب کے استعمال کیخلاف مفتی اسمٰعیل کی رکنیت کالعدم قرار دی جائے اس طرح کی عرضداشت لیکر ممبئی ہائی کورٹ کا دروازہ کھٹکھٹانے والے آصف شیخ رشید کی پیٹیشن پر گزشتہ روز مفتی اسمٰعیل کو افیڈیوٹ داخل کرنے کی ہدایت ممبئی ہائی کورٹ نے دی تھی لیکن تاخیر ہونے کے باوجود مفتی اسمٰعیل نے جواب داخل نہیں کیا تھا جس پر انہیں عدالت نے دس ہزار روپے کا دنڈ بھی عائد کیا تھا اور انہیں پندرہ دنوں کی مہلت دیتے ہوئے اپنا جواب داخل کرنے کی ہدایت دی تھی ۔اس ضمن میں آج 14 اگست کو ممبئی ہائی کورٹ میں معزز جج این جے جمعدار کی عدالت میں دوبارہ سماعت ہوئی ۔پندرہ دنوں کے دوران بھی مفتی اسمٰعیل نے اپنا جواب داخل نہیں کیا اور آج انہوں نے اپنا جواب کچھ عذر کے باعث داخل کیا جس پر ممبئی ہائی کورٹ نے انکا جواب تو قبول کرلیا لیکن مفتی اسمٰعیل کیخلاف اپنی ناراضگی کا اظہار بھی کورٹ نے کیا ۔اس موقع پر پیٹشنر آصف شیخ کے وکیل پٹوردھن کے علاوہ الیکشن کمیشن آف انڈیا کے وکیل، شان ہند کی جانب سے ایڈوکیٹ ایم پی وشی، عائشہ رؤف خان کے ایڈوکیٹ مہیندر اور مفتی اسمٰعیل کے وکیل بھی بامبے ہائی کورٹ میں حاضر تھے ۔یہاں کورٹ نے مفتی اسمٰعیل پر اپنی ناراضگی کا اظہار کیا اور کہا کہ پیٹشنر آصف شیخ کے وکیل کو عدالت اختیار دیتی ہے کہ وہ اس الیکشن پیٹیشن پر مستقل سماعت کیلئے اشو فریم کریں اور آئندہ سماعت 19 اگست بروز منگل کو اسی عدالت میں ہوگی ۔اس طرح کی تفصیلات آصف شیخ نے دی ۔آصف شیخ نے بتایا کہ الیکشن پیٹیشن کی باقاعدہ سماعت کیلئے کون کون سے مدعے شامل کرنا ہے؟ کس بات کو ہائی کورٹ کی نگرانی میں پیش کرنا ہے اور الیکشن پیٹیشن کے عنوانات (اشو)کیا ہونگے کو 14 اگست کو فریم کیا جائے گا ۔اور اس کے بعد عدالت میں بحث ہوگی ۔