ممبئی حملہ: 'کرکرے کی موت قصاب کی فائرنگ سے نہیں ہوئی'؛ آر ایس ایس کے وفادار افسر نے گولی ماری تھی،کانگریس لیڈر کے الزام سے مہاراشٹر کی سیاست میں سنسنی

ممبئی حملہ: 'کرکرے کی موت قصاب کی فائرنگ سے نہیں ہوئی'؛ آر ایس ایس کے وفادار افسر نے گولی ماری تھی،کانگریس لیڈر کے الزام سے مہاراشٹر کی سیاست میں سنسنی 

دیویندر فرنویس نے کانگریس کو قصاب کا حمایتی قرار دیا، بی جے پی شکایت لیکر الیکشن کمیشن پہنچ گئی

 

ممبئی : 7 مئی (بیباک نیوز اپڈیٹ) مہاراشٹر اسمبلی کے اپوزیشن لیڈر وجے وڈیٹیوار کے ایک بیان نے سیاسی تنازعہ کھڑا کر دیا ہے۔ کانگریس لیڈر نے کہا کہ ممبئی میں 26/11 کے دہشت گردانہ حملے میں اے ٹی ایس کے سابق سربراہ ہیمنت کرکرے کو دہشت گرد اجمل قصاب نے نہیں بلکہ آر ایس ایس کے وفادار پولیس افسر نے گولی ماری تھی۔ وڈیٹیوار نے کیس کی نمائندگی کرنے والے وکیل اور شمالی وسطی ممبئی سے بی جے پی کے امیدوار اجول نکم کو غدار قرار دیا۔

 میڈیا رپورٹس کے مطابق وجے ودیٹیوار نے دعویٰ کیا کہ نکم نے ملزم پولس افسر کو بچانے کے لیے ثبوت چھپائے۔ نکم وکیل نہیں بلکہ غدار ہے۔ انہوں نے کہا، 'میرا سوال یہ ہے کہ بی جے پی ایک غدار کو کیوں تحفظ دے رہی ہے اور اس نے ایسے شخص کو لوک سبھا انتخابات میں امیدوار کیوں بنایا؟ کانگریس لیڈر کے بیان سے جب یہ معاملہ زور پکڑا تو ودیٹیوار نے اپنے بیان کی وضاحت کی۔ انہوں نے کولہاپور میں کہا کہ یہ میرے الفاظ نہیں ہیں، میں نے صرف وہی کہا جو ایس ایم مشرف کی کتاب میں لکھا تھا۔ ایس ایم مشرف مہاراشٹر کے سابق سینئر پولس افسر تھے۔ 2018 میں، بمبئی ہائی کورٹ نے کرکرے کی موت پر شکوک پیدا کرنے والی ایک درخواست کو مسترد کر دیا تھا، جس میں دعویٰ کیا گیا تھا کہ ہیمنت کرکرے کو دہشت گردوں اجمل قصاب اور ابو اسماعیل نے گولی نہیں ماری تھی۔

دیویندر فرنویس نے کانگریس کو قصاب کا حمایتی قرار دیا 

 نائب وزیر اعلی دیویندر فڑنویس نے وجے وڈیٹیوار کے اس بیان پر جوابی حملہ کیا ہے۔ انہوں نے کانگریس لیڈر کے الزامات کو بے بنیاد اور غیر ذمہ دارانہ قرار دیتے ہوئے کہا کہ کانگریس قصاب کی حامی ہے۔ عوام کانگریس کو پاکستان کی زبان بولنے کا سبق سکھائیں گے۔اس دوران اجول نکم نے کہا کہ میری امیدواری سے کانگریس میں گھبراہٹ ہے۔میں کانگریس کو چیلنج کرتا ہوں کہ وہ اس الزام کو عدالت میں ثابت کرے۔ کانگریس کس کا ایجنڈا چلا رہی ہے؟ ایڈوکیٹ نکم نے کہا کہ پاکستانی دہشت گرد قصاب نے اپنے اقبالیہ بیان میں کہا تھا کہ اس نے کاما ہسپتال کے قریب فائرنگ کی تھی، جس میں تین پولس اہلکار مارے گئے تھے۔

 بی جے پی الیکشن کمیشن پہنچ گئی۔

 بی جے پی نے الیکشن کمیشن کو خط لکھ کر کانگریس اور اپوزیشن لیڈر وجے وڈیٹیوار کے خلاف شکایت درج کرائی ہے۔ انہوں نے نکم کو مبینہ طور پر جھوٹ بولنے اور بدنام کرنے پر کارروائی کا مطالبہ کیا ہے۔ نکم کا کہنا ہے کہ ایک ذمہ دار لیڈر کی حیثیت سے اپوزیشن لیڈر کو ایسے تبصرے کرنے سے گریز کرنا چاہیے۔ اس سے دشمن ملک کو مدد مل سکتی ہے۔ ممبئی بی جے پی کے صدر آشیش شیلار کا کہنا ہے کہ یہ تمام الزامات جھوٹے اور بے بنیاد ہیں۔ ان کا مقصد صرف نکم کو بدنام کرنا اور جذبات بھڑکانا ہے۔