گیان واپی مسجد معاملہ میں وارانسی ضلعی عدالت کا فیصلہ 1991 کے عبادت ایکٹ کے خلاف اور مایوس کن :آل انڈیا مسلم پرسنل لا بورڈ

گیان واپی مسجد معاملہ میں وارانسی ضلعی عدالت کا فیصلہ 1991 کے عبادت ایکٹ کے خلاف اور مایوس کن :آل انڈیا مسلم پرسنل لا بورڈ 

دہلی : 12ستمبر :( پریس ریلیز)آل انڈیا مسلم پرسنل لا بورڈ کے جنرل سکریٹری مولانا خالد سیف اللہ رحمانی نے ایک پریس نوٹ جاری کرتے ہوئے کہا ہے کہ گیان واپی مسجد سے متعلق ضلعی عدالت کا ابتدائی فیصلہ مایوس کن اور تکلیف دہ ہے۔ مولانا رحمانی نے کہا کہ 1991 میں بابری مسجد تنازعہ کے درمیان پارلیمینٹ نے منظور کیا تھا کہ بابری مسجد کے علاوہ تمام عبادت گاہیں ۱۹۴۷ء میں جس طرح تھیں، ان کو اسی طرح رکھا جائے گا اور اس کے خلاف کوئی نزاع معتبر نہیں ہوگی، پھر بابری مسجد کے مقدمہ کے فیصلہ میں بھی سپریم کورٹ نے مذہبی مقامات سے متعلق ۱۹۹۱کے قانون کی توثیق کی اور اس کو واجب العمل قراردیا مگر اس کے باوجود جو لوگ ملک میں منافرت قائم رکھنا چاہتے ہیں اور جن کو اس ملک کا اتحاد گوارا نہیں ہےانہوں نے بنارس کی گیان واپی مسجد کا مسئلہ اٹھایا اور افسوس کہ مقامی ضلعی عدالت نے ۱۹۹۱کے قانون کو نظرانداز کرتے ہوئے درخواست قبول کرلی اور اب یہ تکلیف دہ مرحلہ بھی سامنے آرہا ہے کہ کورٹ نے ابتدائی طور پر ہندوانتہاپسند گروپ کے اس دعویٰ کو قبول کرلیا اور ان کے لیے راستہ آسان بنادیا ہے۔ یہ ملک و قوم کیلئے تکلیف دہ بات ہے،

اس سے ملک کا اتحاد متأثر ہوگا، قومی ہم آہنگی کو نقصان پہنچے گا۔ انتہاپسندی اور تشدد کو تقویت پہنچے گی ۔اس لئے حکومت کو چاہئے کہ پوری قوت کے ساتھ ۱۹۹۱ کے اس قانون کو نافذ کرے، تمام فریقوں کو اس پر قائم رہنے کی پابند بنائے اور ایسی صورت حال پیدا نہ ہونے دے کہ اقلیتیں انصاف سے مایوس ہوجائیں اور محسوس کریں کہ ان کے لئے انصاف کے تمام دروازے بند ہوچکے ہیں۔

میڈیا رپورٹ کے مطابق گیان واپی شرینگر گوری معاملہ میں وارانسی کی ضلعی عدالت نے ہندو فریق کے حق میں فیصلہ دیا ہے۔ کیس میں فیصلہ سناتے ہوئے ڈسٹرکٹ جج اے کے وشویش کے سنگل بنچ نے کیس کو قابل سماعت سمجھا۔ عدالت نے مسلم فریق کی درخواست مسترد کرتے ہوئے کہا کہ کیس قابل’ سماعت ‘ہے، خیال رہے کہ کیس کی اگلی سماعت 22 ستمبر کو ہوگی۔ اس معاملہ میں مسلم فریق نے 1991 کے عبادت ایکٹ کے تحت دلیل پیش کرتے ہوئے احاطے میں پوجا کی اجازت پر اعتراض کیا تھا۔دوسری جانب ہندو فریق کا کہنا تھا کہ شرینگر گوری میں پوجا کی اجازت دی جائے۔

عدالت نے تحریری حکم میں کہا کہ عبادت گاہوں کے قانون سے متعلق مسلم فریق کی دلیل درست نہیں ہے۔ عرضی گزار صرف گیان واپی کے اندر پوجا کرنے کی اجازت مانگ رہے ہیں۔ میڈیا رپورٹ کے مطابق ہندوفریق کا کہنا ہے کہ 1993 تک وہ وہاں شرنگر گوری ، گنیش، ہنومان جی کی پوجا کرتے رہے ہیں۔ یہ سال 1993 کے بعد ہوا جب انتظامیہ نے ہر روز عبادت پر پابندی لگا دی اور سال میں صرف ایک دن (وسنتک نوراتر کے چوتھے دن) پوجا کی اجازت دینا شروع کی۔