سمندری طوفان "آسنی" اوڈیشہ آندھرا پردیش کے ساحل سے ٹکراگیا ، مہاراشٹر کے مختلف اضلاع میں بارش کی پیش گوئی

سمندری طوفان "آسنی" اوڈیشہ آندھرا پردیش کے ساحل سے ٹکراگیا ، مہاراشٹر کے مختلف اضلاع میں بارش کی پیش گوئی

 ممبئی : 10 مئی (بیباک نیوز اپڈیٹ) سمندری طوفان آسانی سنیچر 7 مئی کو بحیرہ انڈمان میں بنا اور پیر 9 مئی کو شدت اختیار کر گیا۔ یہ سمندری طوفان ایک شدید سمندری طوفان میں تبدیل ہو گیا ہے۔ آج منگل 10 مئی کو یہ طوفان آندھرا پردیش اور اڈیشہ کے ساحلوں سے ٹکرائے گا ایسی توقع محکمہ موسمیات نے لگائی ہے ۔

 محکمہ موسمیات کے مطابق طوفان اس وقت انڈمان اور نکوبار جزائر سے 270 کلومیٹر، پورٹ بلیئر سے 450 کلومیٹر اور آندھرا پردیش اور پوری سے 610 کلومیٹر دور ہے۔  

یہ طوفان منگل کو شمالی آندھرا پردیش اور اڈیشہ کے ساحلوں تک پہنچنے کی توقع ہے۔ اس وقت اس طوفان کی رفتار 80 سے 90 کلومیٹر فی گھنٹہ ہے۔ منگل کو اس کی رفتار 100 سے 120 کلومیٹر فی گھنٹہ بڑھنے کا امکان ہے۔

 بدھ 11 مئی کے بعد طوفان کی رفتار کم ہو کر 60 سے 70 کلومیٹر فی گھنٹہ ہو جائے گی۔ سمندری طوفان جمعرات 12 مئی کو کم دباؤ والی پٹی میں تبدیل ہو جائے گا۔ محکمہ موسمیات نے طوفان کے پیش نظر ماہی گیروں کو سمندر میں نہ جانے کی ہدایت کی ہے۔

  

آندھرا پردیش اور اڈیشہ میں 10 مئی کو اور آندھرا پردیش، مغربی بنگال اور اڈیشہ میں 11 مئی کو موسلادھار بارش متوقع ہے۔

 دوسری طرف، مہاراشٹر کے کچھ حصوں میں اگلے تین دنوں تک ہلکی بارش متوقع ہے۔ ان میں ناندیڑ، لاتور، عثمان آباد، رتناگیری اور سندھو درگ اضلاع میں 10 سے 13 مئی تک ہلکی بارش ہوگی۔ پونہ ، دھولیہ ، جلگاؤں، ناسک، سانگلی، شولاپور، اورنگ آباد، جالنہ ، بیڑ اور احمد نگر اضلاع میں 13 مئی کو بارش کی پیش گوئی کی گئی ہے۔ اس کے علاوہ ممبئی، پربھنی، کولہاپور اور ستارہ میں 11 سے 13 مئی تک گرج چمک کے ساتھ بارش کا امکان ہے۔

دوسری جانب محکمہ موسمیات نے اگلے تین روز ملک بھر میں گرمی کی لہر جاری رہنے کی پیش گوئی کی ہے ۔ راجستھان، دہلی، ہریانہ، گجرات، پنجاب، مدھیہ پردیش، مہاراشٹرا (ودربھ)، اتر پردیش اور بہار میں اگلے تین دن تک شدید گرمی کی لہر جاری رہے گی۔ ریاست کے آکولہ، امراوتی، واشیم اور ایوت محل کے لیے انتہائی گرم علاقہ کی وارننگ جاری کی گئی ہے۔