مالیگاؤں :ایس آئی آر فارم کی تقسیم میں تاخیر برداشت نہیں کی جائے گی، انتظامیہ کی سست روی پر سڑکوں پر نکلنے کا انتباہ

 مالیگاؤں :ایس آئی آر فارم کی تقسیم میں تاخیر برداشت نہیں کی جائے گی، انتظامیہ کی سست روی پر سڑکوں پر نکلنے کا انتباہ 

خدارا بی ایل اوز تعاون کریں،جو فارم پُر ہوگئے ہیں اسے اپلوڈ کریں، آصف شیخ کی عوام اور بی ایل اوز سے جذباتی اپیل 

​مالیگاؤں : 9 جولائی (بیباک نیوز اپڈیٹ) مالیگاؤں شہر میں جاری 'SIR سروے' اور ووٹر لسٹ کی تجدید و اصلاح کے عمل کے دوران ووٹر فارمز کی تقسیم میں ہونے والی شدید تاخیر نے شہریوں اور سیاسی حلقوں میں تشویش کی لہر دوڑا دی ہے۔ اسلام پارٹی کے سینیئر رہنما اور سابق رکن اسمبلی آصف شیخ نے اس سنگین معاملے پر ضلعی انتظامیہ کو آڑے ہاتھوں لیتے ہوئے ایک انتہائی جذباتی اپیل کی ہے اور متنبہ کیا ہے کہ اگر بی ایل اوز (BLOs) کی کارکردگی میں فوری سدھار نہ آیا تو وہ ہزاروں عوام کے ساتھ سڑکوں پر احتجاج کے لیے مجبور ہوں گے۔

​میڈیا کے نمائندوں سے بات چیت کرتے ہوئے آصف شیخ نے بتایا کہ الیکشن کمیشن کے طریقہ کار کے مطابق ہر بی ایل او کو تقریباً 1000 ووٹروں تک فارم پہنچانے کی ذمہ داری دی گئی ہے، لیکن انتہائی افسوس ناک امر یہ ہے کہ 10 دن کا طویل وقت گزر جانے کے باوجود شہر کے بیشتر علاقوں میں محض 20 سے 40 فیصد فارمز ہی تقسیم ہو سکے ہیں۔ انہوں نے کہا کہ ابھی فارم تقسیم ہونا باقی ہیں، اس کے بعد عوام انہیں بھریں گے، جمع کریں گے اور پھر اسکیننگ کا طویل عمل ہوگا، اس لیے انتظامیہ کی یہ سست روی لاکھوں شہریوں کو ان کے حقِ رائے دہی سے محروم کر سکتی ہے۔

​ووٹرز کی پریشانی کا تذکرہ کرتے ہوئے آصف شیخ جذباتی ہو گئے اور انہوں نے الیکشن عملے کو مخاطب کرتے ہوئے کہا کہ خدارا  انسانیت کے نام پر اس شہر کی ماؤں، بہنوں اور بزرگوں کے چہروں کو دیکھو، بیوائیں، طلاق یافتہ خواتین اور ضعیف افراد فارم حاصل کرنے کے لیے در در بھٹک رہے ہیں۔ انہوں نے مزید سخت رخ اختیار کرتے ہوئے کہا کہ یہ ایک مذہبی شہر ہے، اللہ کا خوف کرو اور فارموں کی تقسیم کا عمل فوری تیز کرو، اب ہمارے پاس دو ہی راستے بچے ہیں؛ یا تو ووٹر فارم بھرواؤ یا پھر کفن باندھ لو۔

​آصف شیخ نے صحافیوں کو بتایا کہ انہوں نے اس لاپرواہی کے خلاف صوبائی سطح پر اعلیٰ حکام سے تحریری شکایت درج کرائی ہے اور وہ کل سینٹرل اسمبلی اور الیکشن کے ذمہ دار کمشنر سے ملاقات کر کے شہر کی صورتحال سے آگاہ کریں گے۔ انہوں نے صاف لفظوں میں کہا کہ اگر انتظامیہ نے فوری اور ٹھوس اقدامات نہیں کیے تو شہر میں امن و امان کی ذمہ داری خود انتظامیہ پر ہوگی، کیونکہ عوام اپنے حقوق کے لیے سڑکوں پر نکلنے کے لیے تیار ہے۔

​انہوں نے بی ایل اوز سے مخلصانہ اپیل کی کہ وہ فارم صرف ووٹروں کے گھروں تک نہ پہنچائیں، بلکہ خود جا کر فارم بھروائیں، ان کے دستخط لیں اور اسے جلد از جلد پورٹل پر اپ لوڈ کریں۔ اس کے ساتھ ہی انہوں نے عوام کو بھی ہدایت دی کہ بی ایل او کے آنے پر صرف ایک فارم بھریں تاکہ ڈبل انٹری کا خطرہ نہ رہے اور فارم جمع کرنے کے بعد بی ایل او سے رسید حاصل کرنا نہ بھولیں۔​ناموں کی اسپیلنگ، رشتہ داروں کی غلط میپنگ یا 2002 کے بعد کی ووٹر لسٹوں کی غلطیوں کا ذکر کرتے ہوئے انہوں نے کہا کہ متاثرہ شہری اپنے والدین کی میپنگ کا سہارا لے کر یہ مسئلہ حل کر سکتے ہیں۔ 

انہوں نے عوام سے اپیل کی کہ وہ اپنے تمام ضروری شناختی دستاویزات تیار رکھیں تاکہ الیکشن ڈپارٹمنٹ کی ہیئرنگ کے وقت کوئی رکاوٹ پیش نہ آئے، جبکہ عوامی سہولت کے لیے ہیلپ لائن نمبرز بھی جاری کر دیے گئے ہیں۔​واضح رہے کہ یہ پورا سروے الیکشن کمیشن آف انڈیا (ECI) کے احکامات کے تحت کیا جا رہا ہے اور مالیگاؤں جیسے سیاسی و سماجی طور پر حساس شہر میں ووٹر لسٹ کی بروقت اپ ڈیٹنگ نہ ہونا لاکھوں ووٹروں کے مستقبل کو داؤ پر لگا سکتا ہے۔ شہر کے دانشوروں اور سماجی کارکنان نے بھی عوام سے اپیل کی ہے کہ وہ اپنے جمہوری حق کے تحفظ کے لیے متحد رہیں اور بی ایل اوز کے ساتھ پورا تعاون کریں۔