ممبئی میں موسلادھار بارش، ریڈ الرٹ جاری، ممبئی کے تمام اسکولوں اور کالجوں میں جمعرات 26 ستمبر کو تعطیل

ممبئی میں موسلادھار بارش، ریڈ الرٹ جاری، ممبئی کے تمام اسکولوں اور کالجوں میں جمعرات 26 ستمبر کو تعطیل 

ممبئی : 25 ستمبر (بیباک نیوز اپڈیٹ) موسلا دھار بارش کے پیش نظر ممبئی کے اسکولوں میں کل چھٹی کا اعلان کیا گیا ہے۔اسکولی تعلیم کے وزیر دیپک کیسرکر نے ایک ٹی وی سے بات کرتے ہوئے یہ جانکاری دی۔کیسرکر نے کہا ہے کہ یہ فیصلہ اس لیے لیا گیا ہے تاکہ طلبہ کو کل اسکول جانے کے دوران پریشانی نہ ہو۔

تفصیلات کے مطابق ممبئی اور مضافاتی علاقوں میں آج موسلا دھار بارش ہو رہی ہے۔جس کی وجہ سے مختلف سڑکوں پر شدید ٹریفک جام ہے اور کئی ٹرینیں بھی پٹریوں پر پانی کی وجہ سے پھنسی ہوئی ہیں۔

کیسرکر نے کہا، "ممبئی میں پانی کی بڑی مقدار کی وجہ سے، اسے کم ہونے میں ایک اور دن لگے گا۔ صبح کے وقت اسکول کے لیے نکلنے والے طلبہ کو پریشانی نہ ہو اس لئے کل اسکولوں میں چھٹی کا اعلان کیا گیا ہے۔ کنٹرول روم اس بات کو یقینی بنانے کے لیے صورتحال کی نگرانی کر رہا ہے کہ پانی کی نکاسی ہو۔" 

اس دوران ممبئی میونسپل کارپوریشن نے ٹویٹ کرکے اس کی جانکاری دی ہے۔اس ٹویٹ کے مطابق محکمہ موسمیات نے کل صبح 8:30 بجے تک موسلادھار بارش کے لیے ریڈ الرٹ جاری کیا ہے۔طلباء کی حفاظت کو مدنظر رکھتے ہوئے ممبئی کے تمام اسکولوں اور کالجوں میں جمعرات 26 ستمبر کو چھٹی کا اعلان کیا گیا ہے۔ساتھ ہی برہان ممبئی میونسپل ایڈمنسٹریشن شہریوں سے اپیل کر رہی ہے کہ وہ صرف ضرورت پڑنے پر ہی گھروں سے باہر آئیں۔

 مشرقی مضافاتی علاقوں میں شدید بارش سے وسطی ریلوے متاثر ہوا ہے۔جس کی وجہ سے ڈھلوان اپ اور ڈاؤن روٹ پر ریلوے ٹریفک ٹھپ ہو کر رہ گئی ہے۔فاسٹ ٹریک پر ٹریفک بہت آہستہ چل رہی ہے۔ٹی وی کے نمائندوں نے بتایا ہے کہ وکرولی سے بھانڈوپ علاقہ تک ٹریک پر کافی مقدار میں پانی بھرا ہوا ہے۔