سکم میں فوجی قافلہ حادثہ کا شکار ، 16 فوجی شہید ، چار زخمی ، فوج کا اظہار تعزیت

سکم میں فوجی قافلہ حادثہ کا شکار ، 16 فوجی شہید ، چار زخمی ، فوج کا اظہار تعزیت 

سکم : 23 دسمبر (بیباک نیوز اپڈیٹ) شمالی سکم کے چٹانی علاقے میں زیما کے مقام پر آرمی ٹرک کے حادثے میں 16 فوجی اہلکار شہید ہو گئے۔ اس حادثے میں چار فوجی زخمی ہوئے ہیں۔ حادثہ اس وقت پیش آیا جب گاڑی ایک موڑ پر ٹرن لیتے ہوئے پھسل گئی۔ بتایا جاتا ہے کہ جائے وقوعہ پر کافی بھیڑ ہے اور بچاؤ کا کام تیزی سے جاری ہے۔

موصولہ اطلاعات کے مطابق صبح فوج کی تین گاڑیاں فوجیوں کو لے کر جارہی تھیں۔ یہ قافلہ چٹان سے تھانگو کی طرف جا رہا تھا۔ زیما جاتے ہوئے اچانک تیز جھکاؤ کے باعث ڈرائیور گاڑی پر سے کنٹرول کھو بیٹھا اور گاڑی نیچے وادی میں جاگری۔

اطلاع ملتے ہی مقامی پولیس نے موقع پر پہنچ کر امدادی کارروائیاں شروع کر دیں۔ بتایا جاتا ہے کہ 4 زخمی جوانوں کو ہیلی کاپٹر کے ذریعے باہر نکالا گیا۔ اس حادثے میں 3 جونیئر افسران اور 13 جوانوں کی موت ہو گئی۔ بھارتی فوج نے اس واقعے پر ایک بیان جاری کرتے ہوئے کہا ہے کہ اس واقعے میں شہید جوانوں کے اہل خانہ کی ہر ممکن مدد کی جائے گی اور کہا کہ  وہ اس دکھ کی گھڑی میں سوگوار خاندان کے ساتھ ہیں۔