فلمی دنیاکو ایک اور بڑا صدمہ، یوسف خان المعروف دلیپ کمار کا انتقال، تدفین شام 5 بجے جوہو قبرستان میں کی جائے گی ‏

فلمی دنیاکو ایک اور بڑا صدمہ، یوسف خان المعروف دلیپ کمار کا انتقال، تدفین شام 5 بجے جوہو قبرستان میں کی جائے گی

 دلیپ کمار کا انتقال ایک عہد کا خاتمہ، صدر جمہوریہ، وزیر اعظم،راہل گاندھی سمیت متعدد اہم شخصیات کی تعزیت

 

ممبئی: 7 (بیباک نیوز اپڈیٹ) شہنشاہ جذبات دلیپ کمار کا 98 سال کی عمر میں انتقال

ہندوستان کے عظیم فنکار اور شہنشاہ جذبات کے نام سے مشہور دلیپ کمار کا 98 سال کی عمر میں انتقال ہو گیا۔ ان کا علاج کر رہے ڈاکٹر جلیل پارکر نے اس کی تصدیق کی ہے۔ دلیپ کمار کافی دنوں سے علیل چل رہے تھے اور ان کا ممبئی کے ہندوجا اسپتال میں علاج چل رہا تھا۔ کچھ دن پہلے ان کے شفایاب ہونے کے بعد انہیں گھر لے جایا گیا تھا۔ تاہم ان کی طبیعت دوبارہ خراب ہو گئی اور انہیں دوبارہ اسپتال میں داخل کرایا گیا جہاں کئی دن تک وہ آئی سی یو میں داخل رہے۔

دلیپ کمار کو پچھلے ایک مہینے میں دو بار اسپتال میں داخل کیا گیا تھا۔ 5 جولائی کو دلیپ کمار کے ٹویٹر ہینڈل سے ان کی صحت سے متعلق اطلاع دی گئی تھی۔ دلیپ کمار کی اہلیہ سائرہ بانو نے اپنے ایک بیان میں کہا تھا کہ دلیپ صاحب کی صحت بہتر ہو رہی ہے۔ وہ ابھی اسپتال میں ہی ہیں ، انہیں اپنی دعاؤں سے نوازیں لیکن ان صحت سے متعلق اس معلومات کے دو دن بعد ہی دلیپ کمار الوداع کہہ کر اس دارِ فانی سے کوچ کر گئے

شہنشاہ جذبات دلیپ کمار کا آفیشیل ٹوئٹر ہینڈل سنبھالنے والے فیصل فاروقی نے ٹوئٹ کر کے اطلاع دی ہے کہ دلیپ صاحب کی تدفین جوہو قبرستان میں کی جائے گی۔ انہوں نے ٹوئٹ میں لکھا، ’’انتہائی درد اور گہرے رنج و غم کے ساتھ دلیپ صاحب کے انتقال کا اعلان کرتا ہوں۔ ہم خدا کی طرف سے آئے ہیں اور اسی کی طرف لوٹ جائیں گے‘‘ ایک دوسرے ٹوئٹ میں انہوں نے لکھا، ’’تدفین شام 5 بجے سانتا کروز میں واقع جوہو قبرستان میں کی جائے گی۔‘‘

دلیپ کمار کے انتقال پر اہم شخصیات تعزیتی پیغام جاری کر رہی ہیں۔ کانگریس کے سابق صدر راہل گاندھی نے دلیپ کمار کی ہندوستان سنیما میں کارکردگی کو غیر معمولی قرار دیتے ہوئے کہا کہ ان کے تعاون کو آنے والی نسلیں یاد رکھیں گی۔

راہل گاندھی نے ٹوئٹ کیا، ’’دلیپ کمار صاحب کے اہل خانہ، دوستوں اور مداحوں سے میری دلی تعزیت۔ ہندوستانی سینما کے لئے ان کے غیر معمولی تعاون کو آنے والی نسلیں یاد کیا کریں گی۔‘‘

صدر جمہوریہ رام ناتھ کووند نے دلیپ کمار کی وفات پر جاری اپنے پیغام میں کہا، ’’دلیپ کمار نے اپنی شخصیت سے ابھرتے ہوئے ہندوستان کی تاریخ کا خلاصہ کیا۔ ان کی دلکش اداکاری نے تمام حدود کو عبور کر لیا اور برصغیر بھر میں انہیں پسند کیا گیا۔ ان کے انتقال کے ساتھ ہی ایک عہد کا خاتمہ ہو گیا۔ دلیپ صاحب ہندوستان کے قلب میں ہمیشہ زندہ رہیں گے۔ اہل خانہ اور ان کے بے شمار مداحوں سے میری تعزیت۔‘‘

وزیر اعظم نریندر مودی نے ٹوئٹر کیا، ’’دلیپ کمار صاحب سینما کے لیجنڈ کے طور پر یاد کیے جائیں گے۔ وہ بے مثال مہارت کے حامل تھے، جس کی وجہ سے لوگوں نے نسل در نسل انہیں پسند کیا۔ ان کی وفات سے ہماری ثقافتی دنیا کو نقصان پہنچا ہے۔ ان کے اہل خانہ، دوستوں اور بے شمار مداحوں سے میری تعزیت۔‘‘

شہنشاہ جذبات دلیپ کمار (یوسف خان) کے انتقال پر ملک اور بیرون ملک کی معزز شخصیات کی جانب سے مسلسل تعزیتی پیغامات موصول ہورہے ہیں جن میں ملک کے سیاسی سماجی لیڈران کے علاوہ ممبئی فلم صنعت، بالی ووڈ کی مشہور ہستیوں کے علاوہ تجارتی اور کاروباری افراد بھی اپنے گہرے رنج اور دکھ کا اظہار کررہے ہیں 

اسی کیساتھ مالیگاؤں شہر سے سیاسی، سماجی اور فنی شخصیات کے علاوہ مالی ووڈ نے بھی شہنشاہِ جذبات دلیپ کمار (یوسف خان صاحب) کے انتقال پر اپنے گہرے رنج و غم کا اظہار کیا ہے ۔