مالیگاؤں پولس کی بڑی کارروائی، 400 کلو گوشت کیساتھ عمران شیخ گرفتار، کار سمیت1 لاکھ 80 ہزار روپے مالیت کا سامان ضبط

مالیگاؤں پولس کی بڑی کارروائی، 400 کلو گوشت کیساتھ عمران شیخ گرفتار، کار سمیت1 لاکھ 80 ہزار روپے مالیت کا سامان ضبط 

مالیگاؤں: 19 ستمبر (بیباک نیوز اپڈیٹ) مالیگاؤں شہر اور اطراف کے علاقوں میں امن و امان برقرار رکھنے اور غیر قانونی سرگرمیوں پر قابو پانے کے لیے ناسک دیہی پولیس کی جانب سے کارروائیوں کا سلسلہ جاری ہے۔ اسی ضمن میں مالیگاؤں کے چالیس گاؤں پھاٹا علاقے میں پولیس نے ناکہ بندی کے دوران گوشت کی مبینہ غیر قانونی نقل و حمل کا معاملہ بے نقاب کرتے ہوئے ایک شخص کو گرفتار کیا ہے۔پولیس کارروائی کے دوران ایک سوئفٹ ڈیزائر کار کی تلاشی لی گئی، جس میں تقریباً 400 کلو گرام گئو ونش سے مشابہ گوشت برآمد ہوا۔ پولیس نے گوشت اور نقل و حمل کے لیے استعمال کی جانے والی کار سمیت تقریباً 1 لاکھ 80 ہزار روپے مالیت کا سامان ضبط کیا ہے۔گرفتار کیے گئے شخص کی شناخت مالیگاؤں کے رہائشی عمران ہارون شیخ کے طور پر کی گئی ہے۔ پولیس نے اسے حراست میں لے کر معاملے کی مزید تفتیش شروع کر دی ہے۔پولیس اس بات کا بھی پتہ لگا رہی ہے کہ مذکورہ گوشت کہاں سے لایا گیا تھا اور اسے کہاں منتقل کیا جانا تھا۔

 ناسک دیہی پولیس سپرنٹنڈنٹ ڈاکٹر ڈی۔ ایس۔ سوامی اور ایڈیشنل سپرنٹنڈنٹ پولیس سورج گنجال کی ہدایت پر خصوصی کارروائیاں کی جا رہی ہیں۔ مالیگاؤں تعلقہ پولیس اسٹیشن کے انچارج پولیس انسپکٹر رگھوناتھ شیگر کی رہنمائی میں پولیس ٹیم نے چالیس گاؤں پھاٹا علاقے میں ناکہ بندی کی تھی۔اس کارروائی میں پولیس سب انسپکٹر تشار بھدانے، پولیس حوالدار بنکر اور پولیس اہلکار کولی و مالی نے حصہ لیا۔پولیس نے بتایا کہ تہوار کے دوران امن و امان میں خلل ڈالنے یا غیر قانونی سرگرمیوں میں ملوث افراد کے خلاف قانونی کارروائی کی جائے گی۔ گرفتار شخص کے خلاف متعلقہ دفعات کے تحت مقدمہ درج کیا گیا ہے، جبکہ ضبط کیے گئے گوشت کے ماخذ اور اس کی منتقلی سے متعلق مزید تفتیش جاری ہے۔