آگرہ روڈ پر پچاس فٹ بلند ہائی ماسٹ لائٹ کا میئر نسرین شیخ کے ہاتھوں سنگ بنیاد

آگرہ روڈ پر 50 فٹ بلند ہائی ماسٹ لائٹ کا میئر نسرین شیخ کے ہاتھوں سنگ بنیاد

درے گاؤں سے لیکر شیواجی مہاراج مجسمہ تک ہائی ماسٹ لائٹ کی تنصیب کا سلسلہ جاری 

​مالیگاؤں :24 اگست (بیباک نیوز اپڈیٹ)مالیگاؤں میونسپل کارپوریشن کی میئر نسرین شیخ نے شہر کے اہم اور مصروف ترین تجارتی علاقے آگرہ روڈ، سپر مارکیٹ کے قریب 50 فٹ بلند ہائی ماسٹ لائٹ کی تنصیب کا سنگ بنیاد رکھا۔​افتتاحی تقریب کے دوران میئر نسرین شیخ نے باقاعدہ فیتہ کاٹ کر پول کے کام کا آغاز کیا۔ اس موقع پر اپنے خطاب میں انہوں نے کہا کہ شہر میں روشنی کے انتظامات کو بہتر بنانا میونسپل کارپوریشن کی اولین ترجیحات میں شامل ہے، تاکہ شہری رات کے وقت بھی مکمل طور پر محفوظ ماحول میں آمد و رفت کر سکیں اور تجارتی سرگرمیاں بلا رکاوٹ جاری رہ سکیں۔

​

سپر مارکیٹ کے قریب اس ہائی ماسٹ لائٹ کی تنصیب سے نہ صرف اس علاقے کی تاریکی دور ہوگی بلکہ مقامی تاجروں اور رہائشیوں کو بڑی سہولت میسر آئے گی۔ اس منصوبے سے علاقے کی سیکیورٹی کی صورت حال میں بھی نمایاں بہتری کی توقع ظاہر کی جا رہی ہے۔ کارپوریشن انتظامیہ کے مطابق شہر کے دیگر اہم اور تاریک علاقوں میں بھی اس نوعیت کی مزید لائٹس نصب کی جائیں گی۔اس تقریب میں کارپوریٹرس حاجی خالد شیخ، مستقیم ڈگنیٹی، نہال انصاری، آمین انصاری اور آمین خان سمیت میونسپل کارپوریشن کے متعدد اعلیٰ اہلکاروں اور شہریوں کی بڑی تعداد نے شرکت کی۔ مقامی رہنماؤں نے میئر کی اس کاوش کو سراہتے ہوئے کہا کہ بنیادی سہولیات پر توجہ دینے سے شہر کی مجموعی صورت حال میں مثبت تبدیلی آ رہی ہے۔ میئر نسرین شیخ نے اس عزم کا اعادہ کیا کہ وہ شہر کی ہمہ جہت ترقی اور عوامی مسائل کے حل کے لیے اپنی جدوجہد جاری رکھیں گی.