مالیگاؤں کرائم:الپرازولم گولیوں کے خلاف پولس کی کارروائی، دو گرفتار،ہزاروں روپے کا مال ضبط

مالیگاؤں کرائم:الپرازولم گولیوں کے خلاف پولس کی کارروائی، دو گرفتار،ہزاروں روپے کا مال ضبط

مالیگاؤں :28 جولائی (بیباک نیوز اپڈیٹ) مالیگاؤں شہر میں مبینہ طور پر نشہ کے لیے استعمال کی جانے والی الپرازولم گولیوں کی غیر قانونی خرید و فروخت کے خلاف آزاد نگر پولیس نے کارروائی کرتے ہوئے دو افراد کو گرفتار کیا ہے۔ پولیس نے کارروائی کے دوران 3,000 الپرازولم گولیاں، موٹر سائیکل اور موبائل فون سمیت مجموعی طور پر 34,352 روپے کا مال ضبط کیا ہے۔اس کارروائی کے سلسلے میں آزاد نگر پولیس اسٹیشن میں کرائم ریکارڈ نمبر 169/2026 کے تحت این ڈی پی ایس ایکٹ 1985 کی دفعات 8(a) اور 22(b) کے تحت مقدمہ درج کیا گیا ہے۔ 

اس سلسلے میں ایڈیشنل سپرنٹنڈنٹ آف پولیس، مالیگاؤں سورج گنجال نے پریس کانفرنس کے دوران کارروائی کی تفصیلات بتاتے ہوئے کہا کہ پولیس کو خفیہ اطلاع ملی تھی کہ ایک شخص الپرازولم گولیاں فروخت کرنے کی نیت سے آزاد نگر پولیس اسٹیشن کی حدود میں آنے والا ہے۔ اطلاع کی بنیاد پر پولیس نے کارروائی کا منصوبہ تیار کیا۔ پولیس کے مطابق 24 جون 2026 کو شام تقریباً 6:20 بجے پولیس انسپکٹر سندیپ گھُگے کی نگرانی میں جال بچھایا گیا۔ کارروائی کے دوران محمد ایاز نثار احمد انصاری (36) کو واویکر گلی، حسینیہ ہال، بابا ہوٹل کے سامنے، انصار محلہ، کھنڈپڑا روڈ، بھیونڈی تھانے کے قریب سے حراست میں لیا گیا۔

پولیس کے مطابق ملزم کے قبضے سے Alprazolam Tablets I.P. 0.5 mg کی پانچ بکسوں میں مجموعی طور پر 200 سٹرپس برآمد ہوئیں۔ ہر سٹرپ میں 15 گولیاں ہونے کے باعث مجموعی طور پر 3,000 گولیاں برآمد ہوئیں، جن کی درج شدہ قیمت 10,352 روپے بتائی گئی ہے۔اس کے علاوہ پولیس نے 20,000 روپے مالیت کی Hero HF Deluxe موٹر سائیکل، نمبر MH-41-AX-5889 اور 4,000 روپے مالیت کا Redmi 5G موبائل فون بھی ضبط کیا۔ پولیس کے مطابق ضبط شدہ مال کی مجموعی مالیت 34,352 روپے ہے۔

پولیس کے مطابق گرفتار ملزم سے تفتیش کے دوران اس نے مبینہ طور پر بتایا کہ مذکورہ الپرازولم گولیاں اس نے جاوید محمد اسحاق انصاری عرف جاوید بکری (40) سے حاصل کی تھیں، جو قاسم پورہ روڈ، امپاڈا، بھیونڈی کا رہائشی بتایا گیا ہے۔پولیس کے مطابق 25 جولائی 2026 کو آزاد نگر پولیس اسٹیشن کی تفتیشی ٹیم گرفتار ملزم کو ساتھ لے کر بھیونڈی کے شانتی نگر پہنچی۔ مقامی پولیس کی مدد سے جاوید محمد اسحاق انصاری عرف جاوید بکری کو حراست میں لیا گیا۔

پولیس کا دعویٰ ہے کہ مزید پوچھ گچھ کے دوران جاوید بکری نے مالیگاؤں میں الپرازولم گولیوں کی مبینہ فروخت کے سلسلے میں معلومات فراہم کی ہیں۔ پولیس اس معاملے میں الپرازولم گولیوں کی سپلائی اور فروخت سے وابستہ دیگر افراد کے بارے میں بھی تفتیش کر رہی ہے۔

ایڈیشنل ایس پی سورج گنجال نے پریس کانفرنس میں بتایا کہ معاملے کی تفتیش جاری ہے اور اس غیر قانونی کاروبار کے پورے نیٹ ورک تک پہنچنے کی کوشش کی جا رہی ہے۔ پولیس کی جانب سے ضبط شدہ گولیوں کے ماخذ اور ان کی سپلائی چین کے بارے میں بھی مزید معلومات اکٹھی کی جا رہی ہیں۔ یہ کارروائی پولیس سپرنٹنڈنٹ ناسک دیہی ڈاکٹر ڈی۔ ایس۔ سوامی، ایڈیشنل سپرنٹنڈنٹ آف پولیس مالیگاؤں سورج گنجال، سب ڈویژنل پولیس افسر مالیگاؤں سٹی راکیش منگاؤنکر اور آزاد نگر پولیس اسٹیشن کے پولیس انسپکٹر سندیپ گھُگے کی رہنمائی میں انجام دی گئی۔پولیس کے مطابق معاملے میں مزید تفتیش جاری ہے۔