ایک لاکھ سے زائد اسکولوں میں صرف ایک ٹیچر،وزارتِ تعلیم کی رپورٹ میں تشویشناک انکشاف

ایک لاکھ سے زائد اسکولوں میں صرف ایک ٹیچر،وزارتِ تعلیم کی رپورٹ میں تشویشناک انکشاف

سرکاری اسکولوں میں اساتذہ کی کمی اور تعلیمی سہولیات کی صورتحال پر ایک بار پھر سوالات ،29 لاکھ طلباء کے مستقبل پر سوالیہ نشان 

 مہاراشٹر بھی تشویشناک صورتحال سے دوچار، تقریباً دس ہزار اسکولیں ایک ہی ٹیچر کے بھروسے 

نئی دہلی : 8 نومبر (بیباک نیوز اپڈیٹ) ملک کے تعلیمی نظام سے متعلق ایک اہم اور تشویشناک حقیقت سامنے آئی ہے۔ مرکزی وزارتِ تعلیم کی رپورٹ کے مطابق ملک بھر میں ایک لاکھ سے زائد اسکول ایسے ہیں جہاں تدریسی ذمہ داریاں صرف ایک ہی ٹیچر کے سپرد ہیں۔ اس انکشاف نے سرکاری اسکولوں میں اساتذہ کی کمی اور تعلیمی سہولیات کی صورتحال پر ایک بار پھر سوالات کھڑے کر دیے ہیں۔سرکاری اعداد و شمار کے مطابق، تعلیمی سال 2025-26 میں ملک کے مجموعی طور پر 1,00,843 اسکول صرف ایک استاد کے ذریعے چلائے جا رہے ہیں۔ گزشتہ تعلیمی سال کے مقابلے میں ایسے اسکولوں کی تعداد میں 3,282 کی کمی ضرور آئی ہے، لیکن اب بھی ایک لاکھ سے زائد اسکولوں کا ایک ہی استاد کے سہارے چلنا تعلیمی پالیسی کے لیے ایک بڑا چیلنج بنا ہوا ہے۔

ریاست مہاراشٹر بھی تشویشناک صورتحال سے دوچار

ریاستوں کے اعتبار سے آندھرا پردیش 16,357 اسکولوں کے ساتھ پہلے مقام پر ہے، جبکہ جھارکھنڈ میں 9,827 اور مہاراشٹر میں 9,269 اسکول صرف ایک استاد کے ذریعے چلائے جا رہے ہیں۔ اس کے علاوہ کرناٹک میں 8,042، اتر پردیش میں 7,874، راجستھان میں 7,200 اور مغربی بنگال میں 6,769 اسکول اس صورتحال سے متاثر ہیں۔ مہاراشٹر کا تیسرے مقام پر ہونا ریاست کے تعلیمی نظام کے لیے بھی تشویش کا باعث ہے۔ 

29 لاکھ سے زائد طلبہ کی تعلیم متاثر ہونے کا خدشہ

رپورٹ کے مطابق ان ایک لاکھ سے زائد اسکولوں میں تقریباً 29 لاکھ سے زیادہ طلبہ زیرِ تعلیم ہیں۔ ایسے اسکولوں میں ایک ہی استاد کو تدریس کے ساتھ حاضری، انتظامی امور اور دیگر ذمہ داریاں بھی نبھانی پڑتی ہیں۔ بعض مقامات پر پہلی سے پانچویں جماعت تک کے طلبہ کو ایک ہی استاد بیک وقت پڑھاتا ہے، جس کے باعث ہر جماعت کے طلبہ پر انفرادی توجہ دینا مشکل ہو جاتا ہے۔ اس صورتحال سے بچوں کی تعلیمی بنیاد اور معیارِ تعلیم متاثر ہونے کا خدشہ ظاہر کیا جا رہا ہے۔ 

حکومت کی جانب سے اصلاحی اقدامات

اس مسئلے سے نمٹنے کے لیے مرکزی حکومت اور ریاستی حکومتوں کی جانب سے اساتذہ کی دستیابی اور تعیناتی کو بہتر بنانے کی کوششیں کی جا رہی ہیں۔ کم تعداد والے یا صفر داخلہ رکھنے والے بعض اسکولوں کو قریبی بڑے اسکولوں میں ضم کرنے اور اضافی اساتذہ کو ضرورت مند علاقوں میں تعینات کرنے جیسے اقدامات پر توجہ دی جا رہی ہے۔ تاہم، رپورٹ کے یہ اعداد و شمار واضح کرتے ہیں کہ ملک کے دور دراز اور دیہی علاقوں میں معیاری تعلیم کی فراہمی کے لیے اساتذہ کی مناسب تعداد میں تقرری اور منصفانہ تعیناتی انتہائی ضروری ہے۔