مالیگاؤں ۔ منماڑ، ایولہ،کوپرگاؤں ہائی وے 6 لائن بنانے کیلئے 980 کروڑ روپے منظور،چھگن بھجبل کی افسران کو ہدایت


مالیگاؤں ۔ منماڑ، ایولہ،کوپرگاؤں ہائی وے 6 لائن بنانے کیلئے 980 کروڑ روپے منظور،چھگن بھجبل کی این ایچ اے آئی افسران کو ہدایت



مالیگاؤں ۔ منماڑ ہائی وے ناسک، اورنگ آباد، پونہ اور اتر مہاراشٹر کو آپس میں جوڑنے کا اہم ذریعہ 




ناسک: 14 نومبر (بیباک نیوز اپڈیٹ) مہاراشٹر میں مالیگاؤں ۔ منماڑ ،ایولہ کوپرگاؤں کو آپس میں جوڑنے والی اہم شاہراہ کو چار لائن کے بجائے چھ لائن بنانے کی سمت میں اہم پیش رفت سامنے آئی ہے۔ ریاستی وزیر برائے خوراک و شہری رسد چھگن بھجبل نے قومی شاہراہ اتھارٹی (NHAI) کے افسران کو ہدایت دی ہے کہ مذکورہ شاہراہ کی تعمیر اور توسیع کی منصوبہ بندی کرتے وقت مستقبل میں گاڑیوں کی بڑھتی ہوئی تعداد اور ٹریفک کے دباؤ کو مدنظر رکھتے ہوئے اسے چھ لائن بنانے کے لیے ضروری تکنیکی انتظامات کیے جائیں۔موصولہ تفصیلات کے مطابق مرکزی وزیر برائے سڑک ٹرانسپورٹ و قومی شاہراہ نتن گڈکری کی کوششوں سے مالیگاؤں سے کوپرگاؤں تک تقریباً 76 کلومیٹر طویل شاہراہ کی کنکریٹ کاری کے لیے 980 کروڑ روپے کا فنڈ منظور کیا گیا ہے۔اسی منصوبے کے پیش نظر ناسک میں ریاستی وزیر چھگن بھجبل کی صدارت میں قومی شاہراہ اتھارٹی کے افسران کے ساتھ ایک اہم جائزہ میٹنگ منعقد ہوئی، جس میں شاہراہ کے تفصیلی منصوبہ جاتی رپورٹ (DPR) کی تیاری اور جاری کارروائیوں کا جائزہ لیا گیا۔


میٹنگ میں ایولہ شہر کے اندر بڑھتی ہوئی ٹریفک کی بھیڑ، سڑک حادثات اور شہریوں کو درپیش آمدورفت کی پریشانیوں پر تفصیلی تبادلہ خیال کیا گیا۔چھگن بھجبل نے واضح کیا کہ ایولہ شہر میں ٹریفک کے مسئلے کو مستقل طور پر حل کرنے کے لیے بائی پاس سڑک کی تعمیر ضروری ہے۔ اس سلسلے میں انہوں نے قومی شاہراہ اتھارٹی کے متعلقہ افسران اور پروجیکٹ ڈائریکٹر کو ہدایت دی کہ بائی پاس کی تفصیلی پروجیکٹ رپورٹ (DPR) فوری طور پر تیار کرکے اسے آئندہ منصوبہ بندی میں شامل کرنے کی کارروائی کی جائے۔وزیر چھگن بھجبل نے افسران کو ہدایت دیتے ہوئے کہا کہ شاہراہ کی منصوبہ بندی صرف موجودہ ٹریفک کی ضروریات کو سامنے رکھ کر نہ کی جائے بلکہ آنے والے برسوں میں گاڑیوں کی تعداد میں ہونے والے اضافے اور ٹریفک کے بڑھتے دباؤ کو بھی پیش نظر رکھا جائے۔انہوں نے کہا کہ اگر ابھی سے چھ لائن شاہراہ کے مطابق تکنیکی منصوبہ بندی اور ضروری انتظامات کیے جائیں تو مستقبل میں ٹریفک کے مسائل سے بچنے کے ساتھ ساتھ سفر کو زیادہ آسان اور محفوظ بنایا جاسکتا ہے۔



مالیگاؤں ۔منماڑ کوپرگاؤں،ایولہ سے گزرنے والی یہ شاہراہ ناسک، چھترپتی سمبھاجی نگر، اہلیہ نگر، پونہ جیسے اہم شہروں کو آپس میں جوڑنے میں کلیدی اہمیت رکھتی ہے۔ اس راستے کے ذریعے صنعتی، تجارتی اور زرعی سرگرمیوں کو بھی فروغ ملتا ہے،جبکہ روزانہ بڑی تعداد میں مسافر اور مال بردار گاڑیاں اس شاہراہ سے گزرتی ہیں۔ ایسے میں شاہراہ کو جدید سہولتوں سے آراستہ کرنے اور چھ لائن بنانے کی منصوبہ بندی کو مستقبل کی اہم ضرورت قرار دیا جارہا ہے۔

مالیگاؤں کے لیے بھی اہمیت کا حامل منصوبہ

کوپرگاؤں سے مالیگاؤں تک تقریباً 76 کلومیٹر طویل شاہراہ کی کنکریٹ کاری کے لیے 980 کروڑ روپے کی منظوری اور اسے چھ لائن بنانے کی تجویز شمالی مہاراشٹر کے لیے اہم پیش رفت ثابت ہوسکتی ہے۔ بالخصوص مالیگاؤں، منماڑ اور ایولہ کے درمیان آمدورفت کرنے والے شہریوں، تاجروں، کسانوں اور ٹرانسپورٹ کے شعبے سے وابستہ افراد کو اس منصوبے سے مستقبل میں فائدہ پہنچنے کی توقع ہے۔تاہم چھ لائن شاہراہ اور ایولہ بائی پاس کی تعمیر کے سلسلے میں فی الحال منصوبہ بندی اور ڈی پی آر کی کارروائی جاری ہے، جبکہ عملی کام کی پیش رفت آئندہ سرکاری فیصلوں اور منظوریوں سے وابستہ رہے گی۔

ایک تبصرہ شائع کریں

0 تبصرے